Як стала вядома газеце Rzeczpospolita, Партыя зялёных падрыхтавала папраўку да ўрадавага законапраекта, якая прадугледжвае ўсеагульную рэгістрацыю не толькі сабак, але і катоў.
Дэпутатка ад Партыі зялёных Малгажата Трач патлумачыла газеце, што галоўная мэта — паменшыць наступствы бяздомнасці катоў, якая з'яўляецца гэтак жа сурʼёзнай праблемай, як і бяздомнасць сабак. На рашэнне паўплывалі таксама рэгламенты ЕС. Рэгламент Еўрапейскага парламента аб дабрабыце сабак і катоў і іх адсочванні ўводзіць абавязковае чыпаванне катоў.
Муніцыпалітэты будуць абавязаны стэрылізаваць і чыпаваць бяздомных катоў. Таксама няўрадавыя арганізацыі, у статуце якіх прапісана абарона жывёлы, атрымаюць права чыпаваць катоў бясплатна.
У Польшчы налічваецца прыблізна 7 мільёнаў катоў, што ставіць краіну ў лік еўрапейскіх лідараў. Па колькасці катоў Польшча займае чацвёртае месца ў Еўропе і другое — па працэнтнай долі хатніх гаспадарак, у якіх ёсць кот — 41 працэнт семʼяў у Польшчы гадуюць ката.
яс